අපි ගැන

ප්‍රෞඩ ඉතිහාසයකින් පොහොසත් වු ‍ඵෙතිහාසික මාතලේ පුරවරයේ 1987 අංක 15 දරණ ප්‍රාදේශීය සභා පනතින් ස්ථාපිතව පවතින ග්‍රාම නිලධාරි වසම් 42 කින් හා 66000 ක පමණ ජනතාවක් ජිවත් වන වර්ග කිලෝමීටර් 61.3 ක් වු විශාලත්වයකින් යුක්ත මෙම මාතලේ ප්‍රාදේශීය සභා බල ප්‍රදේශය ඉතා සීඝ්‍රයෙන් ජනාකීර්ණය වන මෙන්ම දියුණුවට පත්වෙමින් පවතින පළාත් පාලන බල ප්‍රදේශයක් ලෙස වර්තමානයේ හඳුන්වාදිය හැක.

පණ්ඩුකාභය රාජ්‍ය පාලන කාලය දක්වා දිවෙන ප්‍රාදේශීය පාලන තන්ත්‍රයන් හා ගම් සභා, නගර සභා පාලන කාලයන් පසු කරමින් වර්ථමානයේ මහනගර සභා, නගර සභා හා ප්‍රාදේශීය සභා ලෙස ක්‍රමිකව සුවිශේෂිත වු වෙනස්කම් රැසකට පරිවර්ථනය වෙමින් අවිචින්නව ඉදිරියට පවත්නා රාජ්‍ය හා දේශපාලනය යන දෙඅංශයම මිශ්‍රව පවතින රාජ්‍ය ආයතනයක් ලෙස ප්‍රාදේශීය සභාව සැලකිය හැකිය. මව්කුස පිළිසිඳ ගැනිමේ සිට මරණ මංචකය දක්වා මිනිසාගේ විවිධ වු අවශ්‍යතා සපුරාලීමේදි එහි වගකීම පැවරී ඇති බිම් මට්ටමේ ජනතා සහභාගීත්වයෙන් ක්‍රියාත්මක වන රාජ්‍ය ආයතනය අදාල සභා බල ප්‍රදේශයේ පළාත් පාලන ආයතනය වන බැවින් එම වගකීම් සහිත භාරධුර කාර්යභාරය ඉෂ්ට කිරිමේදී සභා බල ප්‍රදේශයේ මහජන සෞඛ්‍ය, පොදු උපයෝගීතා සේවාවන්, පොදු මංමාවත් ඇතුළු යටිතල පහසුකම් ආරක්ෂා කිරීම හා ප්‍රවර්ධනය කිරීම, විධිමත් කිරීම, පරිපාලනය මනා ලෙස කාර්යක්ෂමව සිදු කරමින් මව්කුසේ සිට මරණය මංචකය දක්වා ජනතාව වෙනුවෙන් පොදු සේවාවන් ඉටු කිරිමට අදාල පළාත් පාලන ආයතනයට අණපනත් මඟින් බලතල හා වගකීම් පවාරා දී ඇත.

එවන් වූ සේවාවන් නිසි පරිදි ක්‍රියාත්මක කිරීමට වාර්ෂික ආදායම් රැස් කිරිම, අතුරු ව්‍යවස්ථා සම්පාදනය, ව්‍යාවස්ථාපිත ආයතනයක් වශයෙන් නීති ක්‍රියාත්මක කිරීම, අණපනත් හා තත්කාලයේ බලාත්මකව පවතින නීති මඟින් පැවරෙන බලතල නිසි ලෙස ක්‍රියාත්මක කිරීම තුලින් තෘප්තිමත් ජනතාවක් බිහි කිරීමට  මාතලේ ප්‍රාදේශීය සභාවේ අප ඉතා කැපවී කටයුතු කිරීම මඟින් මේ වන විටත් මාතලේ දිස්ත්‍රික්කයේ පළාත් පාලන ආයතන අතුරින් අඛණ්ඩව දැනට වසර 8 – 10 ක කාලය තුල දිස්ත්‍රික්කයේ කාර්ය සාධනයේ දි ප්‍රථම ස්ථානයත්, මධ්‍යම පළාතේ විශිෂ්ඨතම පළාත් පාලන ආයතනයක් වශයෙනුත් කීර්තියක් දිනාගෙන ඇත.

මාතලේ ප්‍රාදේශීය සභාව මඟින් සපයන සේවාවන් ලබා ගැනීමට කාර්යාලය වෙත පැමිණිම වෙනුවට e – තාක්ෂණය මඟින් අවශ්‍ය සියළුම සේවාවන් තම නිවසේ සිට ලබා ගනිමින් ප්‍රාදේශීය සභාව ගමට ගෙන යන වැඩසටහන මේ වන විට ආරම්භ කර ඇත. ඒ තුලින් ජනතාවට ශ්‍රමය, ධනය හා කාලය ඉතිරි කර ගනිමින් ඉතා කඩිනමින් සේවාවන් ලබා දීමට මාතලේ ප්‍රාදේශීය සභාව ජනතාවට සමීතම රාජ්‍යය ආයතනය වශයෙන් අප, වර්ථමාන හා අනාගත පරපුරට සරිලන ආකාරයෙන් තිරසර ලෙස සෑම පැතිකඩකින්ම විශිෂ්ඨ තත්වයකට පත්වීමට මාතලේ ප්‍රාදේශීය සභාව නියෝජනය කරන දේශපාලන නායකත්වය හා පරිපාලන ප්‍රධානීයා වශයෙන් මා සමඟ මාගේ සමස්ථ කාර්ය මණ්ඩලය සෑම විටම කැප වී කටයුතු කරන බව සතුටින් ප්‍රකාශ කරමි.

පළාත් පාලන ආයතනයක් තුලින් ජනතාවට ඉටුවිය යුතු සියළුම කාර්ය කර්තව්‍යයන් නිසි ලෙස කාර්යක්ෂමව ඵලදායීව ඉටු කිරීමෙන් ඉදිරි වසර 02 – 03 තුල දිවයිනේ විශිෂ්ඨතම පළාත් පාලන ආයතනයක් ලෙස පත් වෙමින්, මාතලේ ප්‍රාදේශීය සභාව මඟින් කුමන හෝ සේවාවක් අපේක්ෂා කරන මාතලේ ප්‍රාදේශීය සභා බල ප්‍රදේශයේ සහෝදර ජනතාවට මෙන්ම මාතලේ සභා බල ප්‍රදේශයට දිනපතා පැමිණෙන දහස් ගණනක් වන ජනතාවටත් සෞඛ්‍ය සම්පන්න, පොදු පහසුකම් වලින් පුර්ණ සුවදායි පරිසරයක් නිර්මාණය කිරිමේ අපේක්ෂා මල්ඵල ගැන්වීමට මා සමඟ අපගේ සමස්ථ කාර්ය මණ්ඩලය කැපවී කටයුතු කිරීමේදී එම ඉලක්ක සපුරා ගැනිමට මාතලේ ප්‍රාදේශීය සභාව සමඟ සෑම කාර්යයකදීම අදහස්, යෝජනා හා චෝදනා ඉදිරිපත් කරමින් අප සමඟ එක්ව කටයුතු කිරීමට ඔබට ගෞරවයෙන් ආරාධනා කරමි.